دخول بلا أستئـــذان !!!
ـــــــــــــــــــــــــــــــــــــــــــــــــــــــ
من بلاوى هذا الزمن الأغبر ..مايسمى بالأنترنت .. ممكن يعطيك معلومات .. لكن برضه ممكن يدمر ثقافتك ، وكل اللى تعلمته ..فإنك عندما تبدأ صباحك كالعادة بفتح إيميك الشخصى ، علشان تراجع أمورك الهامة .. فتفاجىء بعشرات الرسائل من ناس ماتعرفهاش .. فتلاقى واحد بيعرض عليك فيللا فى شرم الشيخ بمبلغ بسيط هو 2مليون وثمانمائة ألف جنيه ( يابلاش.. شوف البرود وقلة الأدب !!) ..وواحد تانى بيعرض عليك أحدث أجهزة الموبايل ب4 كاميرات وراديو .. وواحدة أخرى تعرض نفسها ..بس كلمنى على التليفون .. ( وهن كثيرات جدا .. ولكنى لا أريد الحديث عنهن !! ) وشركة تبشرك بأنك ربحت 100 ألف دولار .. بس أدخل وشوف ...(ولما تدخل مابتشوفش حاجة غير شوية حرامية ..وعمليات نصب عينى عينك!!) .. وواحد تانى يبعت لك من أفريقيا أو بلاد الواق الواق .. ويقوللك أنه مدير بنك كذا .. وأن عائلة بكاملها من عملاء البنك ماتت فى حادث طائرة ..وهى تملك ملايين الدولارات ..ولا وريث يرث كل ذلك .. وأن الأختيار وقع عليك ليحولوا كل الملايين دى اليك نظير 30% منها .. وأن الأختيار وقع عليك لأمانتك ( فى حين أنه مش عارف أسمك ..وأرسل الرسالة معممة للكثيرين !! ) بس لازم ترسل بياناتك كاملة الأسم ..والعنوان ..وأهم حاجة حسابك فى البنك علشان يحولوا لك المبلغ لك المبلغ ..ولما تتجنن وتطمع .. ) وتصدق وترسل رقم حسابك .. تانى يوم ماتلاقيش فيه ولا مليم .. إزاى ماأعرفش .. .. وأنا عندى صديق طماع تعرض لهذا الموقف ..لكن الحمدلله ماكانش عنده فى حسابه غير 430 دولار ..بس برضه أخذوها .. وأنا مؤمن بالمثل القائل ( طول مالطماعين فى الدنيا .. فالنصابين بخير ) .. والمشكلة أن وقتك بيضيع مابين قراءة هذه الرسائل المزعجة .. ثم مسحها .. ده خلاف عصبيتك ..وحرقة دمك ..وحنقك من البلاوى اللى بتوصلك يوميا على بريدك الشخصى .. وفى الآخر تلاقى نفسك ضيعت ثلاث أرباع الوقت فيما لاينفع ... والسؤال هو من سمح لكل هؤلاء باقتحام عزلتك .. وخصوصيتك ... بل ويحاولون الدخول لعقلك بكل بجاحة .. وقذارة ..ودون أستئذان ..واللى يغيظك أكتر إنه يكتب لك فى آخر رسالته إذا كنت لاترغب فى الأشتراك لدينا فيمكنك مراسلة هذا الرابط ..( يابارد .. ياغلس .. ياسخيف .. هو أنا أصلا أشتركت معاكم ..ولا أعرفكم من أصله علشان ألغى الأشتراك !! ) وإياك أن تظن أننى أدعو للأستغناء عن الأنترنت .. فهو يحتوى على العديد من الفوائد ..كما يحتوى على العديد من الموبقات .. فيمكنك التواصل مع العالم كله من حولك بضغطة أصبع ... ويمكنك التواصل مع من تريد فى الوقت الذى تريد وأيضا بضغطة أصبع ... يمكنك الأطلاع على مقالات العديد من الكتاب والمثقفين الذين لايجدون مكانا لهم بين المنافقين من كلاب السلطة .. وطيور الظلام ...يمكنك البحث عن المعلومة التى تريدها وأنت متأكدا من صحتها .. والعديد من الفوائد .. والموضوع كله بين يديك .. أنت الذى يختار المفيد .. والمدمر .. تضييع وقتك .. أو تستخدمه لفائدتك ومنفعتك ..تدمر ثقافتك ..وتدمر ثقافة وأخلاق أبناءك .. أو بناء أساس سليم من العلم والثقافة والمعرفة لك ولهم .. يجعلهم بذرة صالحة لجيل تأمل فيه الأمة بكاملها ..والأمر بين يديك ياصديقى ... ومثل ماسبق وشرحت أن هناك الموبقات .. والفوائد فى الأنترنت .. فأنا متأكد أن هناك أيضا منكم من يبحث عن المفيد ..وأيضا من يبحث عن الموبقات ( والعياذ بالله ) .. ولله فى خلقه شئون ..
بقلــــم
صـــــلاح إدريـــــــس
نشرت فى عمودى الأسبوعى ( بالبلدى الفصيح ) عدد السبت 20 يونيه 2009 .
