علشان نهيص ..لازم التوريث !!
ــــــــــــــــــــــــــــــــــــــــــــــــــــــــــــ
ناس كثيرة لبستها فكرة ( التوريث ) ..نايمة ..قايمة ..مابتفكرش غير فى ( التوريث ) ..لدرجة إنهم مابقوش شايفين حاجة غير هذه الفكرة المهببة !! وماضيعوش وقت ..وبدأوا فى مهاجمة الفكرة عطال على بطال .. ففى الصحف ..والندوات ..وجلسات القهاوى مع أصحابهم ..وحتى وهم يتلذذون بالمحشى مع زوجاتهم وعيالهم على ترابيزات الطعام.. وصوروا الفكرة على أنها من صنع الشيطان الرجيم .. أو الشيطان ومجموعة من أصدقائه ومعاونيه الأبالسة !!.
لكن الحقيقة غير كده خالص .. فلو عرفنا أن الممالك أصبحت جمهوريات ( دكتاراطية ) ..وأصبحت الجمهوريات ممالك ( ديمقتاتورية ) ...عرفنا الغلط اللى وقعنا فيه فين !! لأن التوريث له فوائد كثيرة حاأقول لكم على بعضها ..على سبيل المثال لا الحصر :-
1- لما تيجى تهيىء واحد للتوريث ..فهذا معناه إن( المورث)
سوف يتوكل على الله فى يوم ما .. فينتهى ظلمه .. ولصوصيته ..ويأتى بعدها ( الوريث ) ليعلن فى كل وسائل الإعلام .. أنه ليس على دين أبيه أو مورثه .. وإن كل همه وأحلامه هو خدمة الشعب .. ( عينى عليك ياالشعب !! ) ..وحاتمضى مدة طويلة قبل أن يعرف طرق أبيه فى السرقات واللصوصية ..وجمع الملايين ..وإزاى يقمع الشعب والشغب .. ويضرب الكل على قفاهم !! وبكده الناس ترتاح سنة ولا سنتين من غير مشاكل ..لغاية صاحبنا مايعرف طريقه فى سكة اللى يروح مايرجعش !!
2- بما أن الشعوب العربية كلها ملك للحاكم .. يعمل فيها
اللى هو عايزه ..يموته ..يحييه ..يجوعه ..يشبعه ..يأمره بالإنجاب .. أو يجعله عقيما .. ( فهو شعبه وهو حر فيه .. يفرده .. يتنيه .. يقطعه ..يرفيه ..يبيعه ..يشتريه!!! ) .. علشان كده الحاكم خصص أيام معينه للإنجاب .. وممنوع على الرجال لقاء نسائهم .. إلا بأمر منه !! واللى يخالف الأوامر .. يبقى نهاره ونهار أهله أسود من قرن الخروب !! من حبس ..وتعذيب ..ونفخ ..ونفى خارج البلاد !! لكن ( الوريث) الجديد فإنه يسمح للشعب بالإنجاب ..من غير أوامر .. أو تعليمات ..وحايسيبها سداح ..مداح ..مباحة للجميع !!
3- بما أن الحاكم من الشعب ..وإلى الشعب .. والدقيق أو القمح اللى بتتصدق بيه أمريكا علينا كمعونه .. أو علف البهائم اللى بييجى من روسيا ..وأوكرانيا ..وبرضه بيتوزع على المخابز على إنه قمح ..وكل ده كان بيتسرب ..ويتسرق ..ويتوزع مكاسبه على المقاطيع ..والمحاسيب .. ويجوع الشعب أو يقف فى طوابير العيش 8 ساعات يوميا .. أو يروح فى ستين داهيه ..!! كل ده حايتغير مع ( الوريث الجديد ) لأنه لايعرف إزاى يمشى أموره فى موضوع غذاء الشعب ده ( اللى مكاسبه بالمليارات )..والخسارة بسيطة وغير مهمه وهى ( تجويع الشعوب !! وأيه يعنى !! ) ..ويحتاج برضه فتره من الزمن .. لغاية مايعرف ..ويفهم اللعبة دى كويس ..وهنا يقدر الشعب يعيش فى بحبوحة شوية ..وياسعده ..وهناه فقد يستطيع أن يأكل 3 أرغفة فى اليوم بدلا من رغيف ..ويقف فى الطابور ساعتين تلاته بس ..بدل ثمانى ساعات !!.
4- كل جديد له بهجة .. وأهلنا قالوا ( الغربال الجديد له شدة !!) فالحاكم الجديد سيصعد المنابر المختلفة ..من مجالس الشعب والبرلمانيات ( الديمقراطية طبعا !!!!! ) ليقول كلام حلو ..ومتستف .. عن محاسنه ..ومميزاته .. ويعطى أوامر صارمة بعدم التصفيق له ..علشان يحافظ على كرامة الشعب ( ههههههههه) .. وخلونا نعمل فى هدوء ..وصمت !! فهدفنا مصلحة الشعب من محدودى الدخل !!!
وبعد كام يوم تلاقى رئيس الوزراء( ياولداه ) يصدر أوامره بإعادة التصفيق !! ويعلم الناس ذلك .. فيترحمون على الحاكم ..الطيب ... لكن رئيس الوزراء ده ..خبيث .. ومنافق .. و..و.. وينزلوا فى الراجل هجوم ..وشتائم ..ودعاء عليه .. لأنه أصدر تعليمات وأوامر مخالفة لأوامر الحاكم الطيب !!
ففى عالمنا العربى .. رئيس الوزراء هو كبش الفداء ..وهو الممسحة .. وهو الدوبلير بتاع الحاكم ... وعليه أن يتلقى كل اللوم بقاذوراته بدلا منه ... والحاكم دائما طيب ..مبتهج ..بسيط .. لكن رئيس الوزراء ده .. ياساتر يارب .. ده من الأعداء !!!
5- بما أن الحاكم الجديد ( المورث ) تم تدريبه بمعرفة المخابرات الأمريكية ..على أصول القمع ..والقهر ..(وكيفية الضرب على القفا بحيث يوجع ويرن من غير مايترك أثر!! ) ..وكل أنواع التدريبات اللازمة للحكام العرب .. ويفخر الحاكم طبعا بهذه التدريبات ..التى سبقه إليها والده ... ولهذا ستنام إسرائيل ..سعيدة ..هنية ..فى فلسطين لقرن قادم ..!!! إذا لماذا القتال والأنتحار فى مواجهة إسرائيل .. نحن نخسر فقط !! فاتعظوا ..ولاتقاوموا ..وناموا ..ناموا ..فما فاز إلا النوم !!!!!
6- بما أن الحاكم العربى دينه ..ومذهبه ..وديدنه هو السرقة ..والعمولات ..والرشاوى ..وتخزين الأموال فى غرف سرية ( فالبنوك قد يتم أكتشافها فى أى وقت ) وبما أن الشعوب على دين ملوكها .. فسيسلك الشعب نفس طريق حاكمه ..من السرقة واللصوصية .. فتنتشر السرقات ..والرشاوى ..والفساد بكل أنواعه .. وبهذا تتعدى الشعوب حواجز الفقر .. وهى ميزة جميلة ..تعلمتها من قدوتها .. حاكمها الهمام !!!!!
7- المفتون ..وشيوخ الإسلام .. جاهزون دائما للفتوى بمبايعة الحاكم ... بل إن بعض الفتاوى تصدر من القصور الحاكمة ..وماعلى المفتون والمشايخ ..إلا أن يضعوا بصمتهم الكريمة على الفتاوى !!!( يعنى يبصموا!! ) كما أن المجالس التشريعية ..جاهزة لتغيير الدستور فى أى لحظة حسب رغبة وإشارة الحاكم ..والقضاء أيضا جاهز للمبايعة ( رغم صراخهم بأنهم لايقبلون التدخل فى شئون القضاء!!!) .. لذا – فإن الشيوخ يتحولون إلى مبخرة ..ومجالس الشعب إلى مسخرة ..والقضاء إلى مجزرة .. وكل ذلك بفضل ( الحاكم الجديد ..والقديم معا .. فصفقوا أيها الرجال ..وزغرتن أيتها النساء !!!
هذه سبعة ميزات للحاكم الجديد ..فلماذا لانوافق فورا على التوريث ؟؟ ..ونرسل برقيات التهانى بالآلاف .. وتزغرد النساء ..والرجال تصفق ..وتصفق ..وتصفق ..حتى تدمى يدهم .. فالحمدلله أصبحت الدماء كثيرة فى أجساد شعوبنا .. بعد أن وصل الرخاء ..والرفاهية ..لكل شعوبنا !!!
بقلــم
صـــلاح إدريــــس
نشرت فى عمودى الأسبوعى(بالبلدى الفصيح) بجريدة (عين الحقيقة ( عدد السبت 13 يونيه 2009 .
